يسرا عن مشهد إعدامها بفيلم امرأة آيلة للسقوط: شميت ريحة الموت.. وعشماوي جابلي حبل جديد
كشفت الفنانة يسرا، عن كواليس مشهد الإعدام التي جسدته في فيلم امرأة آيلة للسقوط، مشيرةً إلى أنه كان من أصعب المشاهد واللحظات التي مرت في حياتها على الإطلاق.
وقالت يسرا خلال ندوة البطولة النسائية في ميزان شباك التذاكر، على هامش مهرجان الجونة السينمائي بدورته التاسعة: كانوا عايزين يلموا الفلوس عشان يتنفذ الفيلم، بس من أصعب مشاهدي في الفيلم ده، هي لحظة الإعدام وفاكرة إنهم قالولي إننا هنعملها ديكور وقولتلهم معندناش فلوس عشان نعمله ديكور وتمام هعمله بنفسي، بس فاكرة إنه أصعب إحساس في حياتي وأنا واقفة على طبلية الإعدام وشميت ريحة الموت.
وأردفت يسرا: أنا كنت عايزة أوفر ليهم إنهم يبنوا ديكور قد كده إحنا بنحب الشغلانة وبنقدسها، فيه ناس فلست وعملت فيلم واحد وبس، زي السيدة آسيا أنتجت فيلم صلاح الدين وبعدها المخرج يوسف شاهين قالي إنها فلست، ولكن الفيلم الحلو هيفضل عايش وتاريخه جميل سواء إحنا عيشنا وكملنا أو موتنا، نوع الفن ده هيفضل عايش.
وأضافت: قولت لعشماوي والنبي متشدش جامد لحسن ديه فيها موت مش هزار، قالي أنا جايبلك حبل جديد متحطش على رقبة حد قبل كده، عشماوي بنفسه هو اللي عمل الدور، وخرجت قولتلهم إني بحمد ربنا على كل شعراية ونعم ربنا اللي ادهالنا؛ لأن اللحظة مرعبة ومخيفة.
واختتمت يسرا حديثها، قائلةً: إحنا بردو بنشوف حاجات وبتعلمنا كفنانين، أنا اتعلمت من الفن حاجات عمري ما كنت هعرفها في الحياة غير لو قريتها وجربتها من خلال فيلم عملته، إحنا بنعيش الحالة.