الفنانة نسمة محجوب بمنتدى مصر 2026: الفنان مش مطلوب منه يكون واعظ لكنه لازم يكون واعي بتأثير اختياراته الفنية
شاركت الفنانة نسمة محجوب بمنتدى مصر 2026 وألقت كلمة حول دور الفن في تعزيز القيم والتعبير عن قضايا الشباب.
الفنانة نسمة محجوب بمنتدى مصر 2026: الفنان مش مطلوب منه يكون واعظ لكنه لازم يكون واعي بتأثير اختياراته الفنية
وقالت محجوب خلال كلمتها: اتشرفت بحضوري اليوم في منتدى مصر لعام 2026، مضيفة: أنا عايزه أبدأ بسؤال: إزاي الفن يقدر يؤثر في الشباب، مش بس في أفكارهم ومشاعرهم، لكن كمان في اختياراتهم وتصرفاتهم اليومية؟ وإزاي يتحول من رسالة بنسمعها أو كلمات بنرددها، إلى قيمة بنعيش بيها؟.
وتابعت: أنا مؤمنة إن الفن من أقوى وسائل التواصل مع الإنسان، لأنه مش بيخاطب العقل بس، لكنه بيخاطب المشاعر والوجدان. ممكن أغنية، أو مشهد في فيلم، أو شخصية في مسرحية، تخلينا نفكر في قضية اجتماعية أو إنسانية، ونفهم تجربة مختلفة عن تجربتنا، ونشوف العالم من وجهة نظر شخص تاني ودي خطوة أساسية في بناء قيم زي التعاطف، واحترام الاختلاف، وفهم الآخر.
وواصلت: لكن التأثر بالرسالة الفنية مش كفاية لتحويل القيمة إلى سلوك يومي فيه فرق بين إننا نسمع أغنية عن تقبل الآخر، وبين إننا نختار نحترم شخص مختلف عننا فعلا. وفيه فرق بين إننا نتكلم عن المسؤولية، وبين إننا نتحمل مسؤولية حقيقية في موقف صعب، مضيفة: وعشان كده، دور الفن مش إنه يقول للشباب إيه الصح وإيه الغلط، أو يفرض عليهم رؤية معينة، لكنه يفتح مساحة للتفكير والنقاش، ويساعدهم يراجعوا أفكارهم ويكونوا قناعاتهم بنفسهم. لأن الفن الحقيقي مش بالضرورة بيقدم إجابات جاهزة؛ أحيانًا أهم دور ليه إنه يخلينا نسأل الأسئلة الصح.
وأكملت: وعشان ننقل التأثير ده من المشاعر والأفكار إلى سلوك يومي؟
أولًا: لازم نقدم القيم في سياق حقيقي يشبه حياة الشباب بدل ما نتكلم عن التسامح واحترام الاختلاف بشكل مباشر ووعظي، نقدر نقدم حكاية أو شخصية أو موقف يخلي الشاب يشوف نفسه أو أصحابه أو أسرته في العمل الفني. لما القيمة ترتبط بتجربة إنسانية حقيقية، بتكون فرصتها أكبر إنها تلمس الإنسان وتفضل معاه.
ثانيًا: لازم نخلق فرص لممارسة القيم، مش بس الاستماع ليها. لو قدمنا عملًا فنيًا عن التنمر، ممكن يتبعه حوار في مدرسة أو جامعة، أو مبادرة يقودها الشباب لمواجهته. ولو بنتكلم عن الانتماء والمسؤولية المجتمعية، نقدر نحول التأثير ده المشاركة في نشاط تطوعي أو مبادرة لخدمة المجتمع. هذا الفن بيكون نقطة البداية، لكن التجربة العملية هي اللي بتساعد القيمة تتحول لسلوك
ثالثًا: لازم نفهم إن الشباب النهارده مش مجرد متلقين للفن، لكنهم كمان صناع ليه. أي شاب عنده موهبة يقدر يشارك فنه مع الناس، والجمهور يقرر يتفاعل معاه أو لا. ولو عايزين نوصل للأجيال الجديدة، لازم نفهم عالمهم ونحترم أسئلتهم، وتستخدم الوسائط اللي بيتفاعلوا معاها من الموسيقى والمسرح والسينما لحد المحتوى الرقمي.
وأوضحت: ومهم كمان إننا نفتح المجال لأشكال فنية وأصوات جديدة، حتى لو مختلفة عن ذوقنا أو عن المعتاد بالنسبة لنا. بدل ما نرفض الاختلاف، نحاول نفهمه ونتعامل معاه بجدية، لأن الحفاظ على التواصل بين الأجيال بيبدأ بالاستماع لبعض، مش بالحكم على بعض.
ولفتت إلى: وهنا بييجي دور الفنان ومسؤوليته، الفنان مش مطلوب منه يكون واعظ أو نموذج مثالي في كل حاجة، لكنه لازم يكون واعي بتأثير اختياراته الفنية وسلوكه العام، خصوصا على الشباب اللي ممكن يشوفوا فيه مصدر إلهام أو قدوة. لأن السلوك أحيانا بيكون أقوى من الكلام، والرسالة بتفقد جزءًا من مصداقيتها لما يكون فيه تناقض واضحبينها وبين صاحبها.
وأشارت إلى أنه: وده يرتبط بما أشار إليه فخامة الرئيس في احتفالية وطن السلام بمدينة الفنون والثقافة، عن دور الفن باعتباره أحد أهم العناصر المؤثرة في الذوق العام لأى مجتمع، والتشدد فيه ممكن يفسد هذا الذوق العام.
وتابعت: وفي الوقت نفسه، ما ينفعش نحمل الفن وحده مسؤولية تغيير المجتمع. الفن ممكن يفتح الباب ويلهم ويغير طريقة التفكير، لكنه محتاج بيئة تدعم استمرار التأثير ده أسرة تشجع الحوار، ومدرسة تنمي التفكير النقدي، ومؤسسات ثقافية تتيح المشاركة، وإعلام يقدم نماذج متنوعة وإيجابية، من غير ما تحول كل عمل فني إلى درس أخلاقي.
واختتمت حديثها: في النهاية، أنا مؤمنة إن الفن مش مطلوب منه يغير العالم في أغنية، لكنه يقدر يبدأ تغييرا حقيقيا في إنسان والإنسان ده ينقل التغيير لحياته وللناس اللي حواليه؛ لأن القيمة مش في إننا نعرف نقول الكلام الصح، لكن في إننا نختار نعمل الصح لما نواجه موقفا حقيقيا.