أكد محمد الشناوي، حارس مرمى النادي الأهلي، أهمية مواجهة كيتارا الأوغندي في إياب الدور التمهيدي الثاني من بطولة كأس الكونفدرالية الإفريقية، مشددًا على رغبة الفريق في تحقيق نتيجة إيجابية وحسم التأهل إلى دور المجموعات.
وقال الشناوي في تصريحات قبل المباراة: مباراة مهمة لأنها بتأهلنا لدور المجموعات في البطولة، ودايمًا بنقول إنها عبارة عن 180 دقيقة، خلصنا الشوط الأول هناك وباقي الشوط الثاني هنا في مصر.
وأضاف: داخلين بكل تركيزنا وبنحضر بشكل كويس وأي فريق بنواجهه في إفريقيا بنواجه صعوبات، ممكن بسبب السفريات، وتحديدًا السفرية اللي سافرناها كانت طويلة شوية.
وتابع حارس الأهلي: في الأول والآخر نجحنا في الشوط الأول وبنطمح إننا نطلع بنتيجة إيجابية إحنا كسبنا الشوط الأول، وباقي الشوط الثاني هنا في القاهرة وسط جماهيرنا وده بيخلي اللعيبة مركزة أكتر وبالنسبالنا عايزين نكسب عشان نصعد للدور الجاي.
واختتم محمد الشناوي تصريحاته قائلًا: طبعًا اتفرجنا على المباراة السابقة وحددنا النقط الإيجابية لينا والنقط السلبية اللي كانت عندنا.