نعرض لكم زوارنا أهم وأحدث الأخبار فى المقال الاتي:
أحمد زكي يكتب: بالبلدي كده ليه الخليج بيدفع تمن الخناقة بين أمريكا وإيران؟, اليوم الثلاثاء 9 يونيو 2026 07:00 مساءً
ما زالت الكلمة حائرة بين مفهوم لم يقصد ومقصود لم يفهم فاجعل كلمتك بسيطة حتى يفهم مقصدها وبين سخرية وجدية تأتى كلماتي كحقنة خفية فى وريد مقصدها...
كل ما تقوم خناقة أو يشتغل ضرب بالنار بين أمريكا وإسرائيل من ناحية، وإيران من ناحية تانية، نلاقي الصواريخ والطيارات المسيرة طارت فورًا ناحية دول الخليج ومنشآت النفط هناك! السؤال اللي بيسأله أي مواطن بسيط إحنا مالنا؟ وليه الخليج يدفع تمن حرب مش بتاعته؟..
الحكاية باختصار هي "لعبة ضغط"
إيران لما بتنضرب، مابتكونش قادرة تضرب أمريكا في عقر دارها لبُعد المسافة وفرق القوة العسكرية، فبتعمل إيه؟
بتضرب جيران أمريكا وحلفائها في الخليج طهران بتعتبر دول الخليج زي "رهينة"، بتضغط عليها عشان دول الخليج بدورها تصرخ وتضغط على أمريكا وتجبرها توقف الحرب.
حكاية القواعد الأمريكية.. حجة إيران الجاهزة
أمريكا عندها قواعد عسكرية ضخمة جدًا في الخليج؛ زي قاعدة "العديد" في قطر، والأسطول الخامس في البحرين، وقواعد تانية في الكويت والإمارات والسعودية.
دول الخليج بتقول دايمًا لـ إيران
"يا جماعة، إحنا مشترطين على الأمريكان إن القواعد دي ما ينطلقش منها ضرب مباشر ليكم "لكن إيران بترد وتقول
"حتى لو الطيارة ما طلعتش من عندكم، غرف إدارة المعركة والرادارات والاتصالات موجودة على أرضكم، فأنتم كده شركاء في الحرب"، وبتستخدم ده كحجة جاهزة لضرب المنشآت الخليجية.
الخسائر مش بس هدم..
دي خسائر فلوس وأمان..
الحمد لله، دفاعات الخليج الجوية
(زي صواريخ الباتريوت) بتصطاد نحو 80% من صواريخ إيران وطياراتها لكن المشكلة فين؟
الصاروخ الدفاعي اللي بيصطاد الطيارة الإيرانية الصغيرة بيكلف ملايين الدولارات، وده استنزاف فلوس كبير.
إيران بتهدد دايمًا بقفل "مضيق هرمز"، وده الطريق الرئيسي اللي بيمشي فيه نفط الخليج للعالم، لما بيحصل قلق، شركات الشحن بتخاف، والأسعار بتولع، والسياحة والاستثمارات اللي بتشغل الشباب بتقف.
كفاية ضرب من الغرب..
وكفاية تهور من إيران...
الرسالة اليوم واضحة ومش محتاجة لف ودوران..
لأمريكا وإسرائيل كفاية ضربات عشوائية مستفزة لإيران، لأن الضربات دي مش بتهد النظام الإيراني، هي بس بتخليه يتهور ويحدف صواريخه على جيرانه في الخليج.
لإيران كفاية لغة تهديد واستعراض عضلات على جيرانك دول الخليج مش أعداء ليكي، ومصلحة إيران إن الخليج يفضل آمن ومستقر، والتهور مش هيجيب غير الفقر والعزلة مطلوب هدوء وعقل.
إزاي الخليج يحمي نفسه؟ (نصائح للمستقبل)
عشان نخلص من المأزق ده، دول الخليج لازم تعمل 4 حاجات أساسية.....
- اتحاد دفاعي حقيقي لازم دول الخليج توحد راداراتها ودفاعاتها بالكامل، عشان تحمي أجوائها بنفسها وماتعتمدش بنسبة على أمريكا كاملا...
- ولازم كلام صريح مع طهران لاستمرار فتح خطوط الكلام الدبلوماسي مع إيران، وإفهامها بوضوح "الخليج خط أحمر، ومش هنكون ساحة لتصفية حساباتكم".
- وعمل طرق بديلة للنفط تسريع تصدير النفط والغاز عبر موانئ تانية بعيدة عن مضيق هرمز (زي البحر الأحمر وبحر العرب)، عشان إيران ماتلويش دراع المنطقة بتهديد المضيق.
- توقيع شروط حازمة مع أمريكا....
بتعديل الاتفاقيات مع واشنطن بشكل معلن وصارم، يمنعها تمامًا من استخدام أي شبكة أو رادار أو أرض خليجية للتجسس أو ضرب إيران، عشان تتقطع الحجة من أساسها.
الخلاصة أمن الخليج مش لعبة، واقتصاده هو عصب العالم كله آن الأوان إن الشرق والغرب يفهموا إن الخليج مش ساحة خلفية لخناقاتهم، واللي هيلعب بالنار في المنطقة دي.. هيحرق أصابعه واقتصاد العالم كله معاه......
تحياتى ومن عندياتى،،،
*قرمشة:
"إذا تهارش الكلبان، فاحفظ ثيابك."
"يا غريب كن أديب."
"ما حك جلدك مثل ظفرك، فتولَّ أنت جميع أمرك."
"من كان بيته من زجاج، لا يرمي الناس بالحجارة."
"النار ما تحرقش إلا رجل اللي واطيها.
إلى اللقاء،،،،
0 تعليق