عبّرت شروق وائل، عاملة مصنع الدقهلية، عن سعادتها بلقاء الدكتور مصطفى مدبولي، رئيس مجلس الوزراء، داخل المصنع، مؤكدة أنها لم تكن تتوقع أن يتحدث إليها أو يسألها عن دراستها وعملها.
وقالت شروق وائل في تصريحات خاصة لـ«القاهرة 24»: «كنت قاعدة بشتغل وبقرأ قرآن لقيت رئيس الوزراء داخل المصنع عندنا وقالنا السلام عليكم».
وأضافت أنها لم تصدق ما حدث، موضحة: «طبعا أنا مصدقتش نفسي أو تخيلت حاجة زي دي قبل كده وحتى متوقعتش يتكلم معايا، وبعد ما مشي الناس كلها كانت فرحانة بيا وصاحب المصنع قالي إني شرفتهم وفخور بيا».
وتابعت: «أنا كنت قاعدة بقرأ قرآن وبدعي في سري فجأة لقيت الدكتور مصطفى مدبولي داخل الوحدة عندنا، ولما اتكلم معايا سألني عن سني وشغلي ودراستي، مكنتش متوقعة أنه أول ما هيدخل هيتكلم معايا».
وأشارت إلى أن أسرتها وأصدقاءها تفاعلوا مع ظهورها على السوشيال ميديا، قائلة: «صحابي وعيلتي لما شافوني على السوشيال ميديا مصدقوش إن دي أنا وكلهم فخورين بيا وقالولي إني شرفتهم، وحقيقي هو الشرف الأكبر والفخر ليا بالمقابلة دي».