
تامر عبده أمين.
عابر للطلاق.
في قرية صغيرة موجودة في جبال مقاطعة “قويتشو” في جنوب غرب الصين، كانت السيدة “وانغ” واللي عمرها تجاوز الـ 65 سنة قاعدة لوحدها في بيت قديم سقفه بيخر مع كل مطرة، وعينيها على الباب اللي مبقاش حد بيخبط عليه من ساعة ما ابنها الوحيد “تشانغ” مات..
سنتين وهي بتكلم صورته كل ليلة، وبتسخن الأكل وتاكل منه لقمتين وتسيب الباقي..
على بُعد أكتر من ألف كيلو في مدينة “هانغتشو”، كانت “لي نا” بتغسل المواعين لما وصلها الخبر بالصدفة من جارة قديمة: “حماتك القديمة عايشة لوحدها، وصحتها على قدها”..
“لي نا” كانت مرات “تشانغ” زمان، واتطلقوا من 12 سنة، طلاق مكانش هادي ولا حلو، وكل واحد راح في طريق..
هي اتجوزت “تشن” وخلّفت منه ولد وبنت، وحياتها اتقفلت على الماضي بقفل وعشرين مفتاح..
بس اللي محدش يعرفه إن طول سنين جوازها الأولى، السيدة “وانغ” مكانتش حماة، كانت أم.. كانت بتصحى الفجر تعمل لها الشوربة وهي تعبانة، وتشيل عنها العيال وهي بتذاكر، وتقف في صفها حتى قدام ابنها، وحتى بعد الطلاق فضلت تبعت للعيال هدوم شتوي من شغل إيديها كل سنة من غير ما تقول اسمها بس كانت مفهومة يعني..
“لي نا” قعدت الليلة دي مانامتش، وتاني يوم الصبح قعدت قدام “تشن” وقالت له جملة واحدة: “أنا عايزة أجيب أم جوزي الأولاني تعيش معانا”..
الراجل سكت شوية، وبعدين قام جاب مفاتيح العربية وقال لها: “يبقى نطلع بدري عشان الطريق طويل”..
ركبوا العربية هما الاتنين، وساقوا يوم ونص بين الجبال والطرق اللي بتلف زي التعبان لحد ما وقفوا قدام البيت القديم..
خبطت “لي نا” على الباب، والسيدة “وانغ” فتحت، وبصت لها كتير كإنها بتتأكد إن عينيها مش بتضحك عليها..
“لي نا” مقدرتش تقول ولا كلمة من اللي حضّرتها طول الطريق، رمت نفسها في حضنها وعيطت زي العيلة الصغيرة اللي تايهة ولقت أمها..
وفي الآخر طلعت الكلمة: “جيت آخدك معانا.. بيتك مستنيكي”..
النهارده السيدة “وانغ” عايشة في أوضة بشباك كبير بيطل على جنينة، وبتعلّم البنت الصغيرة إزاي تعمل الزلابية بالطريقة القديمة، والولد الصغير بيقعد يسمع منها حكايات عن والده اللي اتوفى!..
في مرة السيدة “وانغ” بتسأل “تشن” جوز طليقة ابنها إنه إزاي وافق إنها تيجي تعيش معاهم وهي حيالله حماة مراته من جوزها القديم..
رد “تشن” إن تصرف مراته “لي نا” خلاّه يشوف فيها بُعد جديد من الأصل.. صحيح إن مشاعرها انتهت تجاه جوزها القديم بعد طلاقهم، لكنه تصرف أكد له قد إيه إنها ست أصيلة.. لسه باقية على المعروف اللي كان بيتعمل معاها من حماتها.
سواء في الشغل، أو في العلاقات، أو في الصداقة، مش مهم أي حكاية بدأت إزاي، المهم هتخلص إزاي..
ناس كتير بتبدأ معاك بالورد والوعود وتسيبك في نص الطريق، وناس تانية جايز يكون بينك وبينهم خلافات ومشاكل، بس لما الدنيا تضلّم تلاقيهم أول اللي واقفين جنبك..
أصل الأصل مبيبانش في الأيام الحلوة، ما هي الأيام الحلوة الكل فيها كويس!.. حقيقة الكل بتبان لما الصورة تكون ضبابية مش والشمس طالعة!..
الأصل بيبان في الموقف اللي محدش هيلومك لو هربت منه، ولما يكون بالنسبالك مكسب شخص أهم من قرار باقي القطيع، ساعتها بس بتعرف مين ابن الأصول المأصل ومين كان بيمثّل..
المعادلة المختصرة في فهم البشر هي إن في ناس على الحِلوة “كُلّنا معاك”، وفي الشِدة “ربنا معاك”.
