والدة صغيرة تستغيث: مدرسة بحدائق الأهرام تمنع ابنتي من الدخول وتعرضها للتنمر بسبب إصابتها بضمور العضلات الشوكي
استغاثت والدة الطفلة سيلين أيمن، صاحبة الـ5 سنوات، التي كانت تعاني من مرض ضمور العضلات الشوكي خلال السنوات القليلة الماضية، وتلقت العلاج المخصص لحالتها، بسبب تعنت إدارة مدرسة الصغيرة سيلين ومنعها من دخول المدرسة، فضلًا عن تعرضها للتنمر.


والدة صغيرة تشكو من إدارة مدرسة بحدائق الأهرام لمنعها من الدخول بسبب إصابتها بمرض ضمور العضلات
وقالت رضوى حمدي، والدة الصغيرة سيلين أيمن، في تصريحات خاصة لـ«القاهرة 24»: عايزه حق بنتي، الحمد لله سيلين بتمشي وتتحرك بشكل طبيعي، لكنها ضعيفة بس شوية عن بقية الأطفال، وده بتقارير طبية، لكن المدرسة أجبرتني أوفر لها حد ياخد باله منها، ومش عايزين يتحملوا مسؤوليتها، ودائمًا بيتنمروا عليها إن بنتي مش طبيعية، أنا بجد مش عايزة أي حاجة غير حق بنتي، وحق نفسيتها اللي اتدمرت وهي عندها 5 سنين.
وتابعت والدة الصغيرة سيلين، والتي تعد من أوائل الصغار الذين حصلوا على علاج مرض ضمور العضلات الشوكي: سيلين بنتي اتمنعت من دخول المدرسة امبارح، وباباها وهو بيوصلها، إدارة المدرسة بلغته إن فيه قرار بمنع دخولها المدرسة، ولكن بدون أسباب، ولما باباها صمم إنها تدخل، قعدوها في ديسك على باب المدرسة من الداخل، وقالوا له: زي ما هتسيبها هترجع تاخدها.
وأضافت رضوى حمدي، والدة الصغيرة سيلين أيمن: قدمنا بلاغ وعملنا إثبات حالة ومحضر بالواقعة في قسم شرطة الهرم، وللأسف سيلين كانت موجودة وشافت كل ده ونفسيتها اتدمرت وكانت بتعيط، عمري ما كنت أتخيل إني أقابل مدرسات أمهات يوقفوها على باب المدرسة وتعيط ويمنعوها تدخل الباب، ومديرة معندهاش إنسانية ورحمة.


وتابعت رضوى حمدي، والدة الصغيرة سيلين أيمن: إحنا مش هندخلها، واتنمروا على بنتي، كلامهم معايا إن بنتي مش طبيعية وبيتنمروا عليها، ونفسيتها متأثرة، وإدارة المدرسة بترفض استقبال بنتي وبتعند معايا، رغم إنها طبيعية بشهادة كل الدكاترة.
