وجه إبراهيم حسن، مدير منتخب مصر الأول لكرة القدم، رسالة إلى منتقدي حسام حسن، المدير الفني للمنتخب، داعيًا إلى وقف الهجوم على الجهاز الفني.
وكتب إبراهيم حسن عبر حسابه على فيس بوك: اتقوا الله في مصر، ليه عايزين تكسروا فرحة الناس الطيبة والأطفال اللي رجعوا يحفظوا تيشيرت وشعار منتخبهم وألوان علم مصر؟.. اسألوا المصريين المغتربين عن أطفالهم اللي كانوا قربوا ينسوا ألوان وشكل علم بلدهم، افتكروا لمة الشعب وفرحتهم أثناء وبعد كل مباراة، افتكروا احترام العالم كله لمنتخب مصر.
وأضاف مدير المنتخب: ليه الغل من زمايل لينا كنا بناكل في طبق واحد، وكنا حاملين شعار واحد وهو علم مصر؟.. ليه الغل من معظم الإعلاميين والحرب والهجوم غير المبرر في كل صغيرة وكبيرة، والتقليل من أي نجاح بنعمله؟.. ليه بنكبر الصغير على الكبير وبننسى الأصول اللي الشعب المصري متربي عليها؟.. افتكروا حسام حسن المخلص والمحب لبلده، اللي بينتحر علشان يفرح بلده، من منا بلا أخطاء ولا ابتلاء في حياته؟.. ورغم كل ظروفه الخاصة، عند شغله واسم بلده بيفصل وبيرمي كل حاجة ورا ضهره، ليه يتحارب بالشكل ده عند كل موقف؟.. ليه قبل كل معسكر بتتعلن علينا الحرب الشرسة دي؟
وتابع إبراهيم حسن: نصيحة ورسالة للزملاء اللي نفسهم يبقوا في مكانه، نجاحنا أنا وحسام هو اللي هيديك الفرصة بعد كده تبقى موجود مكانه، علشان اللي بياخد القرار يبقى مطمئن من تجربتنا ويديك فرصتك وما يخافش، وننسى الأجنبي، لكن لو أنا فشلت مش هتجيلك.
كما تحدث عن أزمات صحية مر بها حسام حسن خلال المعسكرات والمباريات والتصفيات، قائلاً إنه أصيب أكثر من مرة، بينها ذبحة جرى إسعافه بعدها بالصدمات في اللحظة الأخيرة، ثم خضع لدعامات وبعدها بشهر دخل غرفة العمليات مرة أخرى. وأضاف أنه تلقى لاحقًا من الطبيب الذي أجرى العملية أن حسام كان بنسبة كبيرة لن يخرج من غرفة العمليات حيًا، بسبب تعقيد الحالة في شرايين القلب.
وأشار أيضًا إلى موقف خلال مباراة البرازيل بعد العملية، موضحًا أن حسام حسن لم يكن قادرًا على المشي أو الوقوف، لكنه أصر على التواجد على الخط حتى لا يشعر اللاعبون أو الكاميرات بأي تأثير معنوي.